الاوراق المطلوبة لعمل ملعب خماسي او اي منشأة رياضية 2025

الاوراق والتراخيص المطلوبة لعمل ملعب او انشاء اي منشأة رياضية

المقالة دي هتفيد كل مستثمر بيفكر في اي مشروع من المشروعات الاتية:

• انشاء نادي خاص
• انشاء ملاعب رياضية استثمارية او ادارة الملاعب والصالات المغطاه.
• انشاء وادارة مجمعات السباحة
• انشاء الاكاديميات الرياضية
• شركات التسويق الرياضي واللاعبين
• ادارة وتشغيل اي منشأة رياضية

هنتكلم بكل بساطة عن الاوراق القانونية ولكن دايماً بننصح كل المستثمرين مهما كان مشروعهم انهم يعملوا مقابلة مع الجهة الاتي ذكرها (مكتب شركات الخدمات الرياضية) وده مكتب موجود في وزارة الشباب والرياضية، بننصح تروح تعمل مقابلة لاحد المسئولين وتشرحله حجم المشروع وتعرف الخطوات اللي تتبعها علشان تكون جهة موثقة قانونياً ولكن احنا هنقولك معلومات تفيدك لو مش هتروح تعمل المقابلة ولكن دايما بنقول انكم تروحوا للمختصين افضل بكتير من المعلومات اللي بنشرحها، علي الاقل انكم تتأكدوا من المعلومات لعل في خطأ صدر مننا.

طيب ايه المطلوب علشان ابدأ مزاولة اي نشاط استثماري رياضي ؟

اولا : الاوراق المطلوبة لوزارة الاستثمار

• عمل ترخيص لشركة مساهمة لايقل رأس مالها عن ٢٥٠ الف وده لو انت هتعمل مزاولة لنشاط رياضي واحد او مليون جنيه لو اكتر من نشاط، ولو مستثمر كبير وناوي تعمل نادي كامل هيكون راس المال لايقل عن ١٠ مليون جنيه.
• وجود مقر للشركة قائم للمراسلات.
• وجود مقر للمشروع المراد تنفيذه ولا مانع ان يكون المقر الاداري للشركة هو مقر النادي او المنشأة الرياضية ولكن بشرط تواجد مكتب داخل المشروع.

ثانيا : الرسوم المطلوبة

بعد ما تطلع السجل التجاري والبطاقة الضريبية بناخد خطوة تانية وهي دفع رسوم الترخيص وده بيكون 0.75 ٪ من رأس مال الشركة اللي مكتوب وبيتم سداد الرسوم للمجلس القومي للرياضة.

ثالثا : استخراج الموافقة من وزارة الشباب والرياضة بالمزاولة

بعد الخطوات اللي اتكلمنا فيها بنجمع اوراقنا وبنقدمها علشان ناخد الموافقة من وزارة الشباب والرياضة

الاوراق المطلوبة لاستخراج الموافقة:

• نسخة من عقد الشركة.
• مستخرج من سجل التجاري بشرط انه يكون حديث
• صورة من صحيفة الاستثمار.
• مركز مالي معتمد من الجمعية العامة اللي هيتم من خلاله الاستثمار في المشروع.
• دراسة مالية بتكاليف المشروع اللي هيتم تنفيذه وده بيكون من معتمد من مكتب محاسبات معتمد ويكون مذكور مصدر التمويل (شخصي – استثمار اجنبي – قروض .. ،خلافه)
• معلومات كاملة عن المدير المسئول وصورة من المؤهل ورقمه التأميني.
• صحيفة الحالة الجنائية لكل المؤسسين واعضاء مجلس الادارة.
• ايصال سداد رسوم الترخيص
• رسم كروكي للمشروع
• عقد ملكية او عقد ايجار مكان المشروع

كدة انت جمعت الورق .. تقدمه فين بقى ؟

فاكر اول مكتب عملت فيه مقابلة (مكتب شركات الخدمات الرياضية) هتروح تديهم الملف بالورق ده كله.

هل ممكن تقدم ورق اقل من كل ده ؟

اه ممكن علشان كدة احنا بننصحكم تروحوا المكتب ده علشان الموظف اللي هيستلم منك الملف يكتب ليك الورق المطلوب بالضبط وده بيكون وفقاً لحجم المشروع.

نتمنى نكون عملنا اضافة ليكم . . استنونا ومعلومات كتير عن المشروعات الرياضية