كيفية إنشاء ارضيات ملاعب النجيل الصناعي ٢٠٢٣

مكملين معاكم في مشروع إنشاء ملعب رياضي رياضي استثماري واتكلمنا معاكم المقالة اللي فاتت عن مكونات الملعب الرياضي وكيفية إنشاء ملاعب كرة القدم

كيفية إنشاء ارضيات ملاعب النجيل الصناعي ( اعمال تجهيز الارضية )

المقالة اللي فاتت اتعرفنا علي مكونات الملعب الرياضي بكل انواعه زي ملاعب النجيل الصناعي والملاعب المطاطية المتعددة زي الترتان والاكريليك.

كنا قلنا ان مكونات الملعب الرياضي :

1 – اختيار الارض لملاعب كرة القدم ( مقاسات ملاعب كرة القدم )

2 – الاعمال المدنية

3 – طبقة العزل

4 – اعمال الحدادة

5 – اعمال الكهرباء

6 – اعمال الشبك

7 – اعمال النجيل الصناعي او الترتان او الاكريليك

تعرف على  كيفية إنشاء ملعب كرة القدم

انهاردة هنمسك اول واهم جزء في تجهيز ملاعب النجيل الصناعي الرياضية بعد اختيار الارض طبعا،

وهو الاعمال المدنية وهي اهم اعمال الملاعب بعد النجيل الصناعي طبعا ولو الاساس بتاع الملعب مش سليم للأسف هتضطر تعمل بعد فترة قصيرة احلال وتجديد للملعب وده هيكلفك حوالي 50 – 60 الف جنيه وده مبلغ كبير بالنسبة ليك لو عدي عليك سنة وهيكون خسارة.

علشان كدة جراس ايجيبت قررت توضح ليكم المواصفات الفنية والهندسية الخاصة بأعمال تجهيز ارضية ملاعب النجيل الصناعي او الملاعب المطاطية زي الترتان او الاكريليك.

هنقسم الاعمال المدنية لملاعب كرة القدم الخماسية لنقط مهمة :

• تهيئة التربة

• طبقة الاساس

• طبقة سد المسام

• طبقة المطاط

• طبقة الاسفنج

• تحديد الملعب

• تهيئة التربة

اول حاجة وهي تهيئة التربة او الارضية ودي بتكون على حسب نوع ارضية الملعب اذا كانت صخرية او رملية او طينية،

وده طبعا بيكون بمعدات التسوية والدك وغيره طبعا من المعدات وده بيتم من خلال تقليب التربة وبنحاول نخلط التربة ببعضها،

وبعد كدة بيحصل عملية تسوية لمنسوب الارضية يعني ميكونش فيه منطقة اعلى من منطقة وبيتم تحديد ابعاد الملعب طول وعرض ،

الخطوة اللي بعدها بيتم دمك الارضية عن طريق الهراس او الدكاك بحيث انه يتم عمل ضغط للارضية في حالة وجود اي فراغات او تهوية في الارضية وده شيئ مهم جدا لو كان الارض طينية ( زراعية ).

طبقة الاساس

تاني حاجة المفروض بيتحط طبقة الاساس وهي الدبش الخاص بالرصف او اسمه الشائع دقشوم وده بيكون من الحجر الجيري الصلب،

وبيكون خالص طبعا من الطين واي شوائب روملية او زلطية وبيكون ( سن 6 ) لانه انسب للرصف وبيحتوي الدقشوم على نسبة من البودرة البيضاء،

و بيكون بكمية حوالي 140 متر مكعب لملعب النجيل الصناعي الخماسي القانوني الدولي 22 * 42 متر مربع وسمك طبقة الدقشوم على حوالي 15 سم ،

بتكون نسبة الدقشوم حوالي 75 % ونسبة البودرة البيضا الخاصة بالدقشوم حوالي 25 %.

الكميات اللي بتتحط في الارض بتكون مختلفة على حسب مساحة الملعب طبعا،

وده بيكون طبقا للمواصفات القياسية ولو عاوز تعرف هينزل قد ايه على المساحة بتاعتك ممكن تبعتلنا ونقولك المواصفات القياسية للملعب بتاعك .

بعد ما بتنزل الكمية المطلوبة وبتكون متأكد انها الكمية المناسبة ليك بتبدأ عملية الفرش والتوزيع على كل مساحة الملعب،

وده بيكون عن طريق معدات مثل القصابية الليزر او غيرها ، بيكون سمك الدقشوم 15 سم وبعد الدك بيوصل السمك حتى 12 سم،

وبعد الدك بيتم رش الارضية بالماء علشان يحصل تماك كويس بين الاحجار وبيتم الحفاظ طبعا على الارضية بعيد عن اي شوائب وبعد كدة بنسيب الملعب فترة 5 -10 ايام علشان نضمن تماسك الارضية كويس .

طبقة سد المسام

تالت حاجة معانا وهي الرمل الحلواني ودي بتكون الطبقة قبل الاخيرة في الاعمال المدنية،

وده بيكون اخر طبقة في الارضية وبتساعد على قفل المسام الخاصة بالدقشوم بعد الدك والرش،

وكمان بتكون حلقة الوصل الاعمال المدنية واعمال النجيل الصناعي بيتم فرد طبقة رمل حلواني بنسبة 40 متر مكعب على سمك 4 – 5 سم.

طبقة المطاط

في معظم الملاعب الدولية المعتمدة من الفيفا بيتم عمل طبقة من المطاط بيتم وضعها بعد فرد الرمل الحلواني ،

بتكون مهمتها تسهيل عملية تطبيع النجيل الصناعي مع الارضية وتقليل الاحتكاك الخاص بقدم اللاعبين مع ارضية الاعمال المدنية وده مش بيتعمل كتير في مصر نظرا لتكلفته العالية.

طبقة الاسفنج

طبقة الاسفنج مرتبط بطبقة المطاط لانها مكملة ليها وبيتم من خلالها عمل الربط بين المطاط والنجيل الصناعي،

وده طبعا بيكون نوع معين من الاسفنج مش اي نوع علشان لو حصل اي نوع من انواع تسريب المياه ميحصلش عفن بين النجيل الصناعي والمطاط.

تحديد الملعب

واخيرا ودي بتكون اعمال البلدورة ودي بتكون نوع من انواع الرصيف الصغير وبيتم بيه تحديد الملعب علشان تكون معروفة.

كدة انتهت الاعمال المدنية الخاصة بملاعب النجيل الصناعي او ملاعب التنس المتعددة زي الترتان والاكريليك .

لو عندك اي استفسار ممكن تسيبه في تعليق تحت واحنا هنجاوبك على كل استفساراتك .